ROJAVA – Hikûmeta veguhêz a Sûriyê Fermana 144/M derxist, ku dayîna hemwelatîbûnê ji Kurdan re rêk dixe. Serlêdan dikarin bi awayekî ferdî an jî malbatî werin kirin, û navend dê li pênc bajaran werin avakirin.
Wezareta Karên Hundir a hikûmeta veguhêz a Sûriyê, li ser bingeha Fermana Hejmar 13 a sala 2026an, Fermana 144/M derxist, ku dayîna hemwelatîbûna Sûriyê ji Kurdan re di çarçoveya fermanê de rêk dixe. Wezaretê diyar kir ku biryar “li ser prensîbên daxuyaniya destûrî ye ku parastina mafên hemwelatîbûnê û wekheviya di navbera hemî welatiyan de garantî dike,” û armanc dike ku aramiya civakî û yekbûna neteweyî xurt bike.
Li gorî fermanê, kesên ku dixwazin hemwelatîbûnê bistînin dikarin bi awayekî ferdî an jî malbatî serlêdan bikin. Serlêdanên ferdî dê bi karanîna Forma 1 werin kirin, lê serlêdanên malbatî dê ji hêla serokê malbatê ve bi karanîna Forma 2 werin kirin. Divê serlêdan belgeyek nasnameyê ya ku ji hêla serokê gundê têkildar ve hatî dayîn, belgeyek rûniştinê ya ku hebûna li Sûriyê îspat dike, û belgeyên fermî yên piştgirî hebin. Fatûreyên elektrîkê, avê û telefonê, an belgeyên ku qeydkirina zarokan li dibistanên li Sûriyê îspat dikin, jî dê wekî belgeyên serlêdanê werin pejirandin.
Pênc navend li Hesekê tên avakirin
Li gorî biryarê, navendên qebûlkirina serlêdanan li Şam, Heleb, Reqa, Dêra Zorê û Hesekê tên avakirin. Li her yek ji Şam, Heleb, Reqa û Dêra Zorê navendek wê were avakirin, di heman demê de pênc navend li Hesekê jî tên vekirin. Li her navendê komîteyek wê were avakirin da ku serlêdanan binirxîne. Serokatiya komîteyê wê ji hêla dadwerekî bi pileya şêwirmend ve were kirin ku ji hêla Wezîrê Dadê ve hatiye destnîşankirin. Nûnerê Daîreya Karûbarên Sivîl a Parêzgehê wê wekî raportor be, û mezinekî Kurd ê ji herêmê yê hemwelatiyê Sûriyeyê jî wê ji hêla parêzgar ve wekî endam were destnîşankirin. Komîte wê berpirsiyar bin ji wergirtina serlêdanan, qeydkirina wan, hevpeyvîna bi serlêderan re, girtina şopa tiliyan û wêneyan, nirxandina dosyayan û şandina wan bo komîteyên binî di nav 20 rojên xebatê yên piştî dema dawî ya serlêdanê de.