NAVENDA NÛÇEYAN – Li Îranê, greva giştî û xwepêşandanên ku ji aliyê xwendekarên zanîngehê ve hatin destpêkirin veguherî xwepêşandanên mezin. Bi hezaran xwendekarên ku kampusên zanîngehan tijî kirin peyama “Ne Şah û ne jî Mela” dan.
Xwepêşandanên ku li Îran û Rojhilatê dest pê kirin, bi grevên xwendekaran berdewam dikin. Xwepêşandanên ku di 28’ê Kanûna 2025’an de li bazara Tehranê ji bo protestokirina krîza aborî dest pê kirin, li seranserê Îranê, bi taybetî Rojhilatê belav bûn. Piştî ku rejîma Îranê xwepêşandanên girseyî bi çeken rast hedef girt, komkujiyeke mezin pêk hat. Ambargoya înternetê ya li seranserê welêt, pêwendiya welatiyan a bi derve re bi piranî qut kiriye.
Di çar rojên dawî de, bi grevên ku ji hêla xwendekaran ve hatin destpêkirin, xwepêşandan dîsa zêde bûn. Xwendekarên zanîngehê di 21’ê Sibatê de ragihandin ku ew ê di 23’yê Sibatê de bikevin grevê.
Di tevahiya rojê de, bi hezaran xwendekaran kampusên zanîngehê tijî kirin û bi dirûşmeyên wekî “Mirin ji Dîktator re” û “Azadî” ew veguherandin qadên mîtîngê.
Xwepêşandan li Zanîngeha Tarbîat Modares a Tehranê, Zanîngeha Alzahra ya Tehranê, Zanîngeha Zanist û Çandê ya Tehranê, Zanîngeha Amîrkabîr a Tehranç, Zanîngeha Teknolojiyê ya Îsfahanê çalakiyên girseyî hatin lidarxistin. Di çalakiyan de peyama “Ne Şah û ne jî Mela” hat dayîn