WAN – Di salvegera Komploya Navneteweyî ya 15’ê Şubatê de li Wanê meşek hate lidarxistin û bang hate kirin ku azadiya fizîkî ya Rêber Apo were pêkanîn.
Di çarçoveya salvegera Komploya Navneteweyî ya 15’ê Şubatê de, li pêşiya Günpaş Marketê li Wanê bi sedan kes civiyan û sloganên “Bijî Serok Apo”, “Bê Serok Jiyan Na Be”, “Bijî Berxwedana Îmralî” bilind kirin. Qedexekirina meşê ji aliyê polîsan ve bû sedema tengezariyê, lê girse li ser meşê israr kir. Paşê bi vekirina ronahiya têlefonên xwe heta pêşiya Nexweşxaneya Hayatê meşiyan û li wir daxuyanî kirin.
Li vir, Hevserokê TUHAY-DERê Osman Başak axaft û got ku 15’ê Şubatê ne tenê girtina rêberekê ye, lê her wiha vegotina projeyên herêmî û destwerdanên hegemonîk e. Wî diyar kir ku komploya navneteweyî encama stratejiya hêzên hegemonîk e ku dixwazin Rojhilata Navîn li gorî berjewendiyên xwe ji nû ve rêxistin bikin. Di vê pêvajoyê de, li hember krîzên modernîteya kapîtalîst, Abdullah Öcalan teoriya Modernîteya Demokratîk wek “Rêya Sêyem” pêşkêş kir û ji bo gelan rêyek çareseriyê vekir. Wî got ku bi komployê hat xwestin ev rêya çareseriyê were birîn û gelên herêmê were kişandin nav şer û pevçûnên netewperestî. Lê ji 15’ê Şubatê 1999’an ve tevî şert û mercên tecrîda giran, Abdullah Öcalan bi paradigmayê xwe senaryoyên “tasfiyekirina gelan” û “kaosê” betal kiriye.
Piştî wî, parlamenterê DEM Partiyê Zülküf Uçar axaft û got ku em komploya 15’ê Şubatê şermezar dikin û komploya ku li dijî Abdullah Öcalan, ku çareserî ji bo Rojhilata Navîn û cîhanê pêşkêş kiriye, hatiye sepandin qebûl nakin. Wî got ku ev komplo bi berxwedanê hate betal kirin û gelê Kurd li dora têkoşîna hebûnê ya ku Abdullah Öcalan pêşxistiye kom bûye. Uçar got: “Îro hebûn hate piştrast kirin, niha jî dor li azadiya Birêz Abdullah Öcalan û gelê Kurd tê.” Wî jî diyar kir ku ew berxwedana li Îmralîyê dixwazin û silav dikin.