NAVENDA NÛÇEYAN – Hevseroka PJAK’ê Peyman Viyan got ku Rojhilata Navîn bi nexşerêyeke tund re rû bi rû ye û gelê Kurd tenê bi avakirina yekîtiya neteweyî dikare xwe ji projeyên dagirkeriyê biparêze.
Hevseroka Partiya Jiyana Azad a Kurdistan (PJAK) Peyman Viyan di hevpeyvîna JIN TV de li ser geşedanên li Rojhilata Navîn û xeteriya ku Kurd û Kurdistan pê re rûbirû bimînin û ji bo valaderxistina vê xeteriyê divê Kurd çi bikin, axivî.
Peyman Viyan got; “Niha şerekî pir dijwar û taybet tê meşandin da ku nexşeya Rojhilata Navîn jinûve were xêzkirin. Ger gelek xwe rêxistin neke û nebe yek, ewê careke din bibe qurbanê projeya hêzên biyanî. Dewletên netewên herêmê bi hişmendiyeke faşîst dixwazin desthilatdariya xwe li ser îradeya gelan ferz bikin. Lêbelê, gelê Kurd, bi pêşengiya projeya azadiya jinan, ji bo tevahiya cîhanê bûye mînakek têkoşînê.”
Her wiha Peyman Viyan da zanîn ku di vê pêvajoya nû de, ruhê netewî di nav hemû beşên civakê de bilind bûye û di dewamê de wiha got; “Ev ji bo Rojhilatê Kurdistanê pir girînge. Ji ber ku rejîma Îranê bi salane hewl dide bi darvekirin, zext û zordariyê desthilatdariya xwe biparêze. Ji ber vê yekê, ji bo ku hêzên siyasî yên li Rojhilatê Kurdistanê ji bo guhertinên li herêmê amade bin, pêdivî bi yekîtiyek mezin heye.”